ਹਵਾਬਾਜ਼ੀ ਉਦਯੋਗ ਵਿੱਚ ਇਸ ਸਾਲ ਸੁਤੰਤਰਤਾ ਦਿਵਸ ਅਤੇ ਰਕਸ਼ਾ ਬੰਧਨ ਦੀਆਂ ਛੁੱਟੀਆਂ ਕਾਰਨ ਹਵਾਈ ਕਿਰਾਏ ਵਿੱਚ ਵਾਧਾ ਦੇਖਿਆ ਜਾ ਰਿਹਾ ਹੈ। ਨੈੱਟਵਰਕ ਥੌਟਸ ਦੇ ਸੰਸਥਾਪਕ ਅਮੇ ਜੋਸ਼ੀ ਨੇ ਕਿਹਾ ਕਿ ਲੋਕ ਲੰਬੀਆਂ ਛੁੱਟੀਆਂ ਦੌਰਾਨ ਯਾਤਰਾ ਕਰਨਾ ਪਸੰਦ ਕਰਦੇ ਹਨ, ਜਿਸ ਨਾਲ ਮੰਗ ਵਧਦੀ ਹੈ ਅਤੇ ਹਵਾਈ ਕਿਰਾਏ ਵੀ ਵਧਦੇ ਹਨ। ਇਸ ਸਾਲ ਖਾਸ ਕਰਕੇ ਸੁਤੰਤਰਤਾ ਦਿਵਸ ਤੋਂ ਰਕਸ਼ਾ ਬੰਧਨ ਤੱਕ ਜ਼ਿਆਦਾ ਛੁੱਟੀਆਂ ਹੋਣ ਕਾਰਨ ਕਿਰਾਏ ‘ਚ ਵਾਧਾ ਹੋਇਆ ਹੈ।
ਸੀਰਿਅਮ ਮੁਤਾਬਕ ਦਿੱਲੀ ਅਤੇ ਪੁਣੇ ਵਿਚਾਲੇ ਹਰ ਹਫਤੇ 160 ਉਡਾਣਾਂ ਹੁੰਦੀਆਂ ਹਨ ਅਤੇ ਪਿਛਲੇ ਸਾਲ ਅਗਸਤ ਤੋਂ ਇਸ ਗਿਣਤੀ ‘ਚ ਕੋਈ ਵਾਧਾ ਨਹੀਂ ਹੋਇਆ ਹੈ। 14 ਤੋਂ 20 ਅਗਸਤ ਦਰਮਿਆਨ ਦਿੱਲੀ-ਪੁਣੇ ਮਾਰਗ ‘ਤੇ ਹਵਾਈ ਕਿਰਾਇਆ 5,257 ਰੁਪਏ ‘ਤੇ ਪਹੁੰਚ ਗਿਆ ਹੈ, ਜੋ ਪਿਛਲੇ ਸਾਲ ਦੀ ਇਸੇ ਮਿਆਦ ਦੇ ਮੁਕਾਬਲੇ 22.6 ਫੀਸਦੀ ਜ਼ਿਆਦਾ ਹੈ। ਟਰੈਵਲ ਏਜੰਟ ਐਸੋਸੀਏਸ਼ਨ ਆਫ ਇੰਡੀਆ ਦੀ ਪ੍ਰਧਾਨ ਜੋਤੀ ਮਯਾਲ ਨੇ ਕਿਹਾ ਕਿ ਯਾਤਰੀਆਂ ਦੀ ਗਿਣਤੀ ਵਧਣ ਦੇ ਬਾਵਜੂਦ ਭਾਰਤੀ ਏਅਰਲਾਈਨਜ਼ ਵੱਖ-ਵੱਖ ਕਾਰਨਾਂ ਕਰਕੇ ਉਡਾਣਾਂ ਦੀ ਗਿਣਤੀ ਵਧਾਉਣ ਦੇ ਸਮਰੱਥ ਨਹੀਂ ਹਨ। ਉਨ੍ਹਾਂ ਕਿਹਾ ਕਿ ਰਕਸ਼ਾ ਬੰਧਨ ਦੇ ਸਮੇਂ ਦੌਰਾਨ ਉਦੈਪੁਰ ਅਤੇ ਦਿੱਲੀ, ਜੈਪੁਰ ਅਤੇ ਮੁੰਬਈ ਵਰਗੇ ਵੱਡੇ ਸ਼ਹਿਰਾਂ ਵਿਚਕਾਰ ਹਵਾਈ ਕਿਰਾਏ ਵਿੱਚ ਕਾਫੀ ਵਾਧਾ ਹੋਇਆ ਹੈ ਅਤੇ ਕਿਰਾਏ ਲਗਭਗ ਦੁੱਗਣੇ ਹੋ ਗਏ ਹਨ।
