ਵੀਰਵਾਰ ਨੂੰ ਨਗਰ ਨਿਗਮ ਨੇ ਜ਼ੋਨ ਡੀ ਅਧੀਨ ਪੈਂਦੇ ਹੈਬੋਵਾਲ ਖੇਤਰ ਵਿੱਚ ਨਿਯਮਾਂ ਦੀ ਉਲੰਘਣਾ ਕਰਕੇ ਬਣ ਰਹੀਆਂ ਇਮਾਰਤਾਂ ਵਿਰੁੱਧ ਤਿੱਖੀ ਕਾਰਵਾਈ ਕੀਤੀ। ਇਸ ਦੌਰਾਨ ਬਲਾਕ 34 ਵਿੱਚ ਜਵਾਲਾ ਸਿੰਘ ਚੌਕ ਤੋਂ ਮੱਛੀ ਮੰਡੀ ਤੱਕ ਨਾਜਾਇਜ਼ ਤੌਰ ’ਤੇ ਬਣੀਆਂ 5 ਦੁਕਾਨਾਂ ਨੂੰ ਢਾਹ ਦਿੱਤਾ ਗਿਆ। ਇਸੇ ਤਰ੍ਹਾਂ ਚੰਦਰ ਨਗਰ ਨੇੜੇ ਮੱਲੀ ਪੈਲੇਸ ਰੋਡ ‘ਤੇ ਬਿਨਾਂ ਕੋਈ ਫੀਸ ਜਮਾਂ ਕਰਵਾਏ 5 ਦੁਕਾਨਾਂ ਦੇ ਖਿਲਾਫ ਕਾਰਵਾਈ ਕੀਤੀ ਗਈ।
ਏਟੀਪੀ ਜਗਦੀਪ ਸਿੰਘ ਅਨੁਸਾਰ ਇਨ੍ਹਾਂ ਦੁਕਾਨਾਂ ਦੀ ਉਸਾਰੀ ਦਾ ਨਕਸ਼ਾ ਨਗਰ ਨਿਗਮ ਵੱਲੋਂ ਪਾਸ ਨਹੀਂ ਕੀਤਾ ਗਿਆ ਸੀ। ਇਸ ਤੋਂ ਇਲਾਵਾ ਜੱਸੀਆਂ ਰੋਡ ਸਥਿਤ ਰਿਹਾਇਸ਼ੀ ਖੇਤਰ ਵਿੱਚ ਚੱਲ ਰਹੀਆਂ ਦੋ ਫੈਕਟਰੀਆਂ ਨੂੰ ਵੀ ਆਸ-ਪਾਸ ਦੇ ਲੋਕਾਂ ਦੀਆਂ ਸ਼ਿਕਾਇਤਾਂ ਦੇ ਆਧਾਰ ’ਤੇ ਸੀਲ ਕਰ ਦਿੱਤਾ ਗਿਆ ਹੈ।
ਵੀਰਵਾਰ ਨੂੰ ਹੀ ਨਗਰ ਨਿਗਮ ਨੇ ਜ਼ੋਨ ਸੀ ਖੇਤਰ ‘ਚ ਸਥਿਤ 4 ਨਾਜਾਇਜ਼ ਕਾਲੋਨੀਆਂ ‘ਤੇ ਕਾਰਵਾਈ ਕੀਤੀ। ਇਹ ਕਲੋਨੀਆਂ ਕੰਗਣਵਾਲ ਪੁਲੀਸ ਚੌਕੀ, ਸਟਾਰ ਰੋਡ ਲੋਹਾਰਾ, ਈਸਟਮੈਨ ਚੌਕ ਨੇੜੇ ਅਤੇ ਸਤਿਸੰਗ ਘਰ ਰੋਡ ’ਤੇ ਬਣ ਰਹੀਆਂ ਸਨ। ਕਲੋਨੀਆਂ ਦੀ ਉਸਾਰੀ ਲਈ ਜਿਸ ਲਈ ਨਗਰ ਨਿਗਮ ਤੋਂ ਕੋਈ ਪ੍ਰਵਾਨਗੀ ਨਹੀਂ ਲਈ ਗਈ ਸੀ, ਉਥੇ ਬਣੀਆਂ ਸੜਕਾਂ, ਸੀਵਰੇਜ ਸਿਸਟਮ ਅਤੇ ਮਕਾਨ ਵੀ ਢਾਹ ਦਿੱਤੇ ਗਏ ਹਨ। ਏਟੀਪੀ ਜਗਦੀਪ ਸਿੰਘ ਅਨੁਸਾਰ ਇਨ੍ਹਾਂ ਕਲੋਨੀਆਂ ਨੂੰ ਬਣਾਉਣ ਵਾਲਿਆਂ ਖ਼ਿਲਾਫ਼ ਪੁਲੀਸ ਕੇਸ ਦਰਜ ਕਰਕੇ ਕਾਰਵਾਈ ਕੀਤੀ ਜਾਵੇਗੀ ਅਤੇ ਰਜਿਸਟਰੇਸ਼ਨ ਅਤੇ ਬਿਜਲੀ ਕੁਨੈਕਸ਼ਨ ਜਾਰੀ ਕਰਨ ਤੋਂ ਰੋਕਣ ਲਈ ਸਬੰਧਤ ਵਿਭਾਗਾਂ ਨੂੰ ਸਿਫਾਰਸ਼ ਭੇਜੀ ਜਾਵੇਗੀ।
